女兒英國IGCSE奪11A　梁芷珊不做怪獸家長：不用迫小朋友讀書

才女梁芷珊與商人前夫羅傑承的16歲女兒Eily為媽媽帶來喜訊，於英國IGCSE放榜喜獲11A佳績！自言從來不是怪獸家長、自封「Hea媽」的她更戲言以「不勞而獲」來形容，向各家長誠言小孩不需瘋狂報讀興趣班，最重要能夠開心快樂地成長。

梁芷珊於Facebook上載與女兒Eily慶祝照片，提到Eily即將於8月30日生日，沒想到女兒提早送她厚禮，獎勵她16年前開刀剖腹誕下愛女，又透露女兒兩年前已到英國讀書，早前報考當地的IGCSE，學校預計Eily會有6A*成績，沒想到日前放榜喜獲11A佳績！

▲ 梁芷珊不做怪獸家長，亦會走「平民路線」與Eily到茶檔用餐。（圖片來源：梁芷珊Facebook）

Eily 8月30日16歲生日，昨日，佢提早咗送份厚禮俾我，獎勵我16年前辛苦生佢出來（其實開刀一啲都唔辛苦，修身辛苦好多）。

佢14歲去英國讀書，今年考GCSE / IGCSE，昨天放榜，因為佢而家喺香港，所以我哋昨日上網等成績。之前佢有啲緊張，因為學校predict佢有6A*，佢擔心令人失望。

結果佢考咗11A，包括1A**， 9A*，1A (Add Maths)，嗰一刻我感覺好安慰，因為最少我唔需要安慰佢。

梁芷珊收到喜訊後，第一時間通知關係良好的前夫羅傑承。

當時我只係諗到要做一件事：打俾羅生。當時佢開緊會，我留短訊：「Eily考咗11A，好開心。我要恭喜你，我哋再一次不勞而獲。」佢覆我：Good, thanks.

以「Hea媽」自稱的梁芷珊指從來未做過怪獸家長，很開心能夠以事實證明，小朋友能夠於開心快樂的環境成長才是最重要。

▲ 梁芷珊與Eily感情深厚，於媽媽生日向她送抱賀壽。（圖片來源：梁芷珊Facebook）

我以「不勞而獲」形容，係因為我哋完全無push個女，無怪獸家長過。
 

跟住我繼續去開會，到夜晚靜落嚟，我先至覺得呢件事其實唔簡單：我人生只係生咗一個女（應該都唔會再生啩），咁，我都算係生咗一個11A女狀元，命中率100%，好好彩。

而值得開心既係，我終於可以用事實來證明，小朋友讀書學習係唔駛迫既，開心快樂成長最緊要，絕對唔駛報十間幼稚園，唔駛補習，唔駛學芭蕾舞，唔需要學七國語言。

今日同佢有個小小慶祝會，佢有個朋友仔，由細玩到大，Andrian剛考到IB 45分，入咗港大醫科。Andrian 媽咪係我中學同班同學，佢都係，爸爸媽媽從來無迫過佢，咪又係做狀元！